امتحـان اللغـة العربيـة =====> اريد الاجابات ولا تنسونا بالردود

السؤال الأول: التعبير
أ-
شهدت بلدنا الحبيبة نهضة فى مجال التشييد والبناء وخصوصا بعد وصول سعر الحديد إلى 6500 جنيه للطن.. اكتب ما يمليه عليك ضميرك على أن يبدأ موضوعك بعبارة: أنا باشتغل فى حديد عز
ب-
اكتب ما لايقل عن 650 سطر فى أحد الموضوعات التالية
لم يجد الطفل غير الشارع ملجأ نظرا لحالة البلد الهباب..فاتجه إلى السرقة والقتل والحشيش.. حتى نال جزاءه وقبض عليه متلبسا بباكتة بانجو.. اكتب قصته مع تسليم الحِرز للباشا مراقب اللجنة
ج-
بعد انتشار ظاهرة أكل لحم الكلاب والحمير..من وجهة نظرك كحمار تكلم عن هذه الظاهرة ومن المتسبب فيها بدون غلط.. الورق متراقب
*******
السؤال الثانى: القصة
أ-
من قصة: وعهد الله ما انت داخل الانتخابات.. اقرأ القطعة وأجب عن الآتى
ثم أتى إليه وضربه بالجزمة وقال: انت عايز تترشح فى الانتخابات يامعفن؟؟ ده انت عايز معجزة.. مش كفاية بتاكلوا لحمة ومستورين.. عايزين إيه تاني؟
ما هى اللحمة؟ أو على الأقل حدد أقرب معنى خيالى لها
مرادف معجزة فى اللغة: تغيير وزارى – زيادة المرتبات – رغيف العيش.. اختر يامقلول البخت
ب-
لماذ ضربه الرجل بالجزمة وليس بالعصى مثلا؟؟
أهو كسل .. لسة هيرفع العصاية؟.. عشان العصاية قلة قيمة برضه واحنا فى عصر الديمقراطية.. عشان العصاية شغالة مع واحد تانى.. افهم انت بقى واختار
ج-
حلل بمزيد من التفصيل جملة: ضربه بالجزمة ومدى توافقها مع جملة مصر بتتقدم بينا
*******
السؤال الثالث: القراءة
أ-
من موضوع: الزعيم.. والفنان.. والقدوة.. اقرأ القطعة وأجب
وقد نفى الزعيم عادل إمام الإشاعات التى أكدت أنه مرشح لوزارة الثقافة.. وأكد أنه فنان فقط وليس سياسيا.. الخبر حقيقي.. كما أنه يرحب بالتوريث ومقتنع بكل سياسات الحكومة
ب-
ذكرنا فى الدرس أن عادل إمام سيتقاضى فى فيلمه القادم 12 مليون جنيه.. فى رأيك ياعم المحروم تبقى البوسة بكام فى الفيلم؟؟
*******
السؤال الرابع: النصوص
أجب عن أحد النصين الآتيين
أ-
من نص: ماشربتش من نيلها.. اقرأ ثم أجب
ماشربتش من نيلها.. جربت تغنى لها.. جربت فى عز ماتحزن تمشى ف شوارعها وتشكيلها
بعد رغبة صاحبة النص فى أن تلد ابنتها فى أمريكا لتحصل على الجنسية الأمريكية.. اختر.. ما المقصود بنيلها فى النص؟
المسيسبى - الأمازون – يونج يانج
هذا النص من نصوص الحزب الوطنى والدليل وجود اسم مهم من قيادات الحزب فى النص.. استخرج الاسم.. وبوسه من بُقـُّه ورجَّعُه مكانه
أكمل الأبيات إلى آخر كحكة فى الكليب
قوبل النص بانتقادات بسبب بعده عن الواقع.. وضّح من النص ما يتفق مع القول المأثور اطبخى ياجارية.. كلف ياسيدى
ب-
من نص: حين ميسرة.. أجب عن الآتى
اذكر اسم مصيبة واحدة محصلتش فى النص الأسود ده
وضح عبقرية أحمد بدير الإرهابى فى النص وهو يكتب رسالة على الكمبيوتر باستخدام أزرار الأرقام فقط ومفيش حروف.. ويعطى أمر التنفيذ بزرار قايمة ستارت مش بإنتر.. كمبيوتر إرهابى بقى
سبب وجود الشرطة كل خمس دقائق فى النص؟
موسم ترقيات عقبال أملتك ولازم شغل.. أخو خالد يوسف ظابط ولازم يخدم أخوه.. عشان الشرطة بتراقب قسم البوليس اللى جنب أحداث النص
*******
السؤال الخامس: النحو
أ-
أعرب ما تحته خط.. لو مالقيتش القطعة أصلا.. اتصرف
ذهب الرئيس إلى المؤتمر .. ضع الجملة السابقة فى صيغة المثنى.. ماعدا الرئيس طبعا يامواطن
ب-
كان ممدوح إسماعيل قاتلا.. ضع إن مكان كان.. على ألا تنصب ممدوح.. عشان هوه بينصب لوحده
ج-
فُرِضت الضرائب علينا ببشاعة
أعرب الجملة.. وارفع الضرائب أبوس إيدك
*******
السؤال السادس: الخط
كوز المحبة انخرم.. طرطش على كمى.. ياحبيبى بطل جفا وارحم عذاب امي
اكتب الجملة السابقة ثلاث مرات بثلاث خطوط.. موبينيل وفودافون واتصالات.. كما يمكن التحويل من خط لخط بنفس الرقم.. فقط اتصل بخدمة العملاء
*******

__________________